ၶေႃႈလိုၼ်းသုတ်း

မီးဝၼ်းၼိုင်ႈ ၼၢင်းသၢဝ်ၶမ်းဢွၼ်ႇ ဢၼ်ယႃႇယုတိုၵ်ႉမီး သိပ်းႁႃႈၶူပ်ႇၵႂႃႇႁူင်းႁဵၼ်းသေ လႆႈၽိတ်းၵၼ်တင်းဢူၺ်းၵေႃႉမၼ်း။ တင်းၸႂ်ဢမ်ႇလီသေပွၵ်ႈမႃးႁိူၼ်း၊ ၽိူဝ်ႇမႃးၽႅဝ်ႁိူၼ်းယဝ်ႉ မူၵ်းယူႇၼႂ်းႁိူၼ်းၸိူင်ႉၼၼ်ယဝ်ႉ။

''သၢဝ်ၶမ်း''မႄႈမၼ်းႁွင်ႉမၼ်းၼၢင်း''လုၵ်ႈၵဝ်ႁဵတ်းသင်ယူႇ ၵၢၼ်ထုၵ်ႇလီႁဵတ်းမီးတင်းၼမ် ၵုမ်ႇမူၵ်းယူႇၼႂ်ႁိူၼ်းၸိူင်ႉၼႆၼႆႉ ႁူႉယူႇဢမ်ႇၸႂ်ႈႁ ပေႃးပွၵ်ႈႁဵၼ်းမႃးယဝ်ႉ မီးၵၢၼ်သင်ၼႆ''

''မႃးယဝ်ႉၶႃႈ မႄႈ…'' တင်းသဵင်ႁွင်ႉယၢဝ်းဢွၼ်ႇမၼ်းၼၢင်းသေ လုၵ်ႉၵႂႃႇၸူးမႄႈမၼ်းၼၢင်းတၢင်းသွင်ႇၽႆးပုၼ်ႉယဝ်ႉ။

''ဢီႈသင်ဢႃႈ…''တၢင်းၸႂ်လမ် တင်းဢဝ်တႃပၵ်းတူၺ်းမႄႈမၼ်း ႁဵတ်းႁႂ်ႈမႄႈမၼ်းၸႂ်လမ်ယူႇ။

မႄႈမၼ်းၸင်ႇလၢတ်ႈၽၢင်ႉမၼ်းဝႃႈ''ပၢၼ်ထၢၼ်ႇၼႆႉယဝ်ႉ ၵဝ်ဢမ်ႇၸႂ်ႉသမ်ႉပေႃးထုၵ်ႇလီပွင်ႇၸႂ်သေမႃးႁဵတ်းႁင်းၵူၺ်းယဝ်ႉၼႆႉ…'' 

မႄႈမၼ်းၶိုၼ်းလၢတ်ႈထႅင်ႈဝႃႈ''ဢမ်ႇၼၼ်ၵေႃႈမႂ်းၶႂ်ႈၺႃးၵိၼ်ႁႃႉတေႃႈ''ၼႆယဝ်ႉ။

မၼ်းၼၢင်းတွပ်ႇၶိုၼ်းဝႃႈ''မင်တူၺ်းလႄႈ''ၼႆသေ

တၢင်းၸႂ်လမ် တၢင်းႁဵတ်းၶိတ်ႈႁဵတ်းပၢႆႇ ဢဝ်ဝၢၼ်ႇၸိူဝ်းဢၼ်မီးႁိမ်းမၼ်းၼၢင်းၸိူဝ်းၼၼ်ႉ ၽတ်ႉမင်ၸိူဝ်းၼၼ်ႉလႄႈဢဝ်ဝၢၼ်ႇတႅၵ်ႇဝၢတ်ႇမိုဝ်းမၼ်းယဝ်ႉ။

မႄႈမၼ်းၵေႃႈတင်းမႆႈၸႂ် တၢင်းၸႂ်လမ်ယဝ်ႉ ၵိုင်ႉၵၢင်ႉႁွင်ႉသႅၼ်ႇဝႃႈ ''သၢဝ်ၶမ်း…မႂ်းႁတ်းၵႃႈႁိုဝ်ဢႃႈ…မႃးႁႃလၢတ်ႈၵႂၢမ်းၸိူင်ႉၼႆတေႃႇၵဝ်ႇယူႇၼႆႉ ၵႂႃႇ…ၵႂႃႇၶဝ်ႈမိူဝ်းၼႂ်းႁိူၼ်းလႄႈ''

''ဢမ်ႇၵႂႃႇ……''ၼႆသေ ဢဝ်ၽႅၼ်ႇၸဵတ်ႉ ၸဵတ်ႉလိူတ်ႈတီႈမိုဝ်းမၼ်းယူႇယဝ်ႉ။

မႄႈမၼ်းၶိုၼ်းဝႃႈ''လၢတ်ႈထႅင်ႈၵမ်းၼိုင်ႈတူၺ်းလူး ၶႂ်ႈႁူႉၼမ်ႉၸုပ်ႉမႂ်းၵေႃႈ"ၼႆလႄႈ

မၼ်းၼၢင်း ၶိုၼ်းဢဝ်မၢၵ်ႇတႃဢၼ်ဢမ်ႇႁၢၼ်ႉၸႂ်သေ ပၵ်းတူၺ်းၶိုၼ်းမႄႈမၼ်းယဝ်ႉ လၢတ်ႈဝႃႈ''ဢမ်ႇၵႂႃႇ…ဢမ်ႇၵႂႃႇ…ဢမ်ႇၵႂႃႇ…''ၼႆထပ်းၵၼ်ယူႇယဝ်ႉ။

မႄႈမၼ်းၵေႃႈယိူၼ်ႉဢမ်ႇလႆႈယဝ်ႉလႄႈဢဝ်ၽႃႇမိုဝ်းတၢပ်ႇပၼ်ၵႅမ်ႈလုၵ်ႈမၼ်းယဝ်ႉ။

မိူဝ်ႈဢွၼ်တၢင်း မႄႈမၼ်းဢမ်ႇယၢမ်ႁႅမ်မၼ်းၸိူင်ႉၼႆ။

ယိင်းသၢဝ်ၶမ်းဢွၼ်ႇၵေႃႈ ၸႂ်လမ်တေႃးသမၼ်းသေ သုတ်ႉႁူၼ်လင်ၵႂႃႇ ဢၢင်ႈတေလႅၼ်ႈဢွၵ်ႇတၢင်းၼွၵ်ႈႁိူၼ်း၊ မိူဝ်ႈမၼ်းၼၢင်းပႆႇလႅၼ်ႈဢွၵ်ႇၼၼ်ႉ မၼ်းၼၢင်းၸင်ႇႁွင်ႉသႅၼ်ႇႁႅင်းႁႅင်းဝႃႈ''ၵဝ်ၸင်းမႂ်း''ၼႆႁင်း

မႄႈမၼ်းသေလႅၼ်ႈဢွၵ်ႇၵႂႃႇယဝ်ႉ။

မႄႈမၼ်းၶိုၼ်းႁွင်ႉ ''ဢေးသၢဝ်ၶမ်း မႂ်မႃးၶိုၼ်းလူး''ၼႆ ႁွင်ႉသႅၼ်ႇၸွမ်းလင်လုၵ်ႈယိင်းမၼ်းယဝ်ႉ။

မၼ်းၼၢင်းတင်းလႅၼ်ႈတင်းလၢတ်ႈဝႃႈ '' ယႃႇမႃးၸွမ်းၵဝ်''ၼႆသေလႅၼ်ႈၶၢမ်ႈတၢင်းၵႂႃႇထႅင်ႈယဝ်ႉ သိုပ်ႇလၢတ်ႈထႅင်ႈဝႃႈ''ၵဝ်ၸင်းမႂ်း''ၼႆယူႇယဝ်ႉ။

ၼၢင်းသၢဝ်ၶမ်းဢွၼ်ႇၵေႃႈလႅၼ်ႈၵႂႃႇယဝ်ႉ ဢမ်ႇႁိုင် ၵိုင်ႉၵၢင်ႉလႆႈငိၼ်းသဵင်လိပ်လင်လင်ဢၼ်ၼိုင်ႈမေႃးမႃးၼႂ်းႁူမၼ်းယဝ်ႉ။

မၼ်းၼၢင်း တင်းဝၢႆႇတူၺ်းတၢင်းလင် တၢင်းဝႃႈ ယႃႇပေႁႂ်ႈမၼ်းၸႂ်ႈဢၼ်ၵဝ်ဝူၼ်ႉသေၵမ်းၼႆယူႇ။

ၵူၼ်းႁိမ်းႁွမ်းၸင်ႇၵိုင်ႉၵၢင်ႉမႃးတူၺ်းသေလႆႈႁၼ်မႄႈမၼ်းၼၢင်းလူမ်ႉၼွၼ်းယဵၼ် ၵူဝ်ႈလိူတ်ႈဝႆႉယူႇၼႂ်ႈၵၢင်တၢင်းၼၼ်ႉယဝ်ႉ။

မၼ်းလႅၼ်ႈမႃးၸူးတီႈဢၼ်ပဵၼ်ၼၼ်ႉသေ ၽိူဝ်ႇႁူႉဝႃႈပဵၼ်မႄႈမၼ်းယဝ်ႉ ၸင်ႇႁွင်ႉသႅၼ်ႇဝႃႈ''ဢမ်ႇ………''ၼႆလင်လင်ယူႇယဝ်ႉ ၽိုတ်ႉၶဝ်ႈမႃးၼႂ်ၵႄႈၵူၼ်းၸိူဝ်းၼၼ်ႉသေ ''မႄႈ………မႄႈ…''ၼႆယူႇ။

လူမ်းထူၺ်ႈၸႂ်ၵေႃႈႁၢႆ သၢႆၸႂ်မႄႈမၼ်းၼၢင်းၵေႃႈသဵင်ႈၵႂႃႇၼိူဝ်တၢင်းလူင်ၼၼ်ႉယဝ်ႉ။

ယိင်းသၢဝ်ၶမ်းၵေႃႈၸင်ႇၵႂႃႇယုၵ်ႉဢဝ်ႁူဝ်မႄႈမၼ်းတၢင်ႇၼိူဝ်တၵ်းသေ တေလၢတ်ႈသင်ၵေႃႇဢမ်ႇဢွၵ်ႇလႆႈ ဢဝ်ၼႃႈဝၢႆႇၶိုၼ်ႈၵၢင်ႁၢဝ်သေဢိုတ်ႇႁႆႈယူႇယဝ်ႉ။

မၼ်းၼၢင်းပေႃးဢမ်ႇၶႂ်ႈယုမ်ႇယဝ်ႉ ဝႃႈၵႂၢမ်းဢၼ်မႄႈမၼ်းလႆႈငိၼ်းၵႂႃႇတီႈမၼ်းၼၢင်း''ၵဝ်ၸင်းမႂ်း''ၼႆၼၼ်ႉ ဝႃႈပဵၼ်ၶေႃႈလိုၼ်းသုတ်းၼႆ။

ပိၼ်ႇတႅမ်ႈ ၶိင်းတႆး

25.3.2015