မဵတ်ႉတႃႇလႄႈမၢၵ်ႇတႃမႄႈ

မဵတ်ႉတႃႇ လႄႈ မၢၵ်ႇတႃမႄႈ

မႄႈၵဝ်ၶႃႈပဵၼ်ၵူၼ်းတႃမွတ်ႇၵေႃႉၼိုင်ႈ ၵဝ်ၶႃႈၸင်းမႄႈၵဝ်ၶႃႈတႄႉတႄႉ ယွၼ်ႉဝႃႈ မၼ်းႁဵတ်းႁႂ်ႈၵဝ်ၶႃႈ လႆႈ တၢင်းဢၢႆၼႂ်းၵႄႈပိူၼ်ႈတႄႉတႄႉဝႃႈဝႃႈၼၼ်ႉယဝ်ႉ မႄႈၶႃႈပဵၼ်ၵူၼ်းႁုင်မိုဝ်ႉ ၼႂ်းႁူင်းႁဵၼ်းၸၼ်ႉၵၢင်ဢၼ်ၼိုင်ႈ ပဵၼ်ႁူင်းႁဵၼ်းတီႈဢၼ်ၶႃႈတိုၵ်ႉၶိုၼ်ႈယူႇ မၼ်းၼၢင်းႁုင်ၶဝ်ႈၽၵ်း လဵင်ႉလုၵ်ႈႁဵၼ်း၊ မေႃသွၼ်ၼႂ်းႁူင်းႁဵၼ်း ၼႆႉသေ လဵင်ႉၼႃႈႁိူၼ်းႁဝ်းယဝ်ႉ။

      မီးဝၼ်းၼိုင်ႈမၼ်းၼၢင်းမႃးတူင်ႉတၵ်ႉတေႃႇၶႃႈလႄႈ ၶႃႈပဵၼ်ဢၼ်ယိၼ်းဢၢႆပိူၼ်တႄႉတႄႉ ၵဝ်ၶႃႈဝူၼ်ႉဝႃႈ "ၵွပ်ႈသင်မၼ်းမႃးႁဵတ်းလႆႈၵဝ်ၸိူင်ႉၼႆ ဢမ်ႇၵူဝ်ၵဝ်လႆႈဢၢႆႈပိူၼ်ႈသေဢိတ်း"ၼႆယူႇ ႁင်းၼႂ်းၸႂ်ၸဝ်ႈၵဝ်ႇ ယဝ်ႉ ဢဝ်မၢၵ်ႇတႃတၢင်းၸင်းၵဝ်ၶႃႈ ပၵ်းတူၺ်းမၼ်းၵမ်းၼိုင်ႈသေ လႅၼ်ႈပၢႆႈယူႇၼွၵ်ႈႁူင်းႁဵၼ်းပုၼ်ႉယဝ်ႉ။

      မီးဝၼ်းၼိုင်ႈတႆးၵေႃႉၵေႃႉၼိုင်ႈမႃးယူႇႁိမ်းၶႃႈသေယဝ်ႉ လၢတ်ႈဝႃႈ"မႄႈမႂ်းတႃမွတ်ႇမွတ်ႇႁေၼေႃ" ၼႆ ႁင်းၶႃႈ လူမ်းတေႃးသၸႂ်လမ်ၼႆႉလုၵ်ႉတီႈလႂ်မႃးၵေႃႈဢမ်ႇႁူႉ မႃးသေႃႇသူၼ်းၼႂ်းၸႂ်ၶႃႈ မၢင်ၵမ်းမၢင်ၵမ်း ၶႃႈပေႃး ဢမ်ႇၶႂ်ႈယူႇယဝ်ႉၼႂ်းမိူင်းၵူၼ်းၼႆႉ လိူဝ်သေၼၼ်ႉဢမ်ႇၵႃး သမ်ႉၶႂ်ႈႁႂ်ႈမႄႈၵဝ်ၶႃႈၼႆႉ ႁၢႆဢွၵ်ႇၵႂႃႇၼႂ်းမိူင်းၵူၼ်းဝႆးဝႆးယဝ်ႉ။ ဝၼ်းၼၼ်ႉၼင်ႇၵဝ်ႇ ၵဝ်ၶႃႈၸင်ႇၵႂႃႇတေႃႇၼႃႈမၼ်းလီလီငၢမ်းငၢမ်းသေ လၢတ်ႈဝႃႈ " သင်ဝႃႈၶႂ်ႈႁႂ်ႈ ၶႃႈမီးတၢင်းသိူဝ်းၼႆ ၸိုင်မႄႈႁဝ်းဢမ်ႇတၢႆႁေ" ၼႆႁင်းမႄႈၵဝ်ၶႃႈယူႇယဝ်ႉ ယွၼ်ႉဝႃႈဝၼ်းၼၼ်ႉ ၺႃးမိူဝ်ႈၸႂ်လမ်ႁႅင်းဝႆႉလႄႈ ၶႃႈၵေႃႈဢမ်ႇတၼ်းဝူၼ်ႉ လွင်ႈဝႃႈမႄႈၵဝ်ၶႃႈတေပဵၼ်ၸိူင်ႉႁိုဝ် ၵွမ်ႉၵွၺ်းႁူႉဝႃႈၶႂ်ႈပၢႆႈဢွၵ်ႇၵႂႃႇၵႆၵႆ တီႈဢၼ်ဢမ်ႇမီးမၼ်းၼၼ်ႉၵူၺ်းယဝ်ႉ။

     ဝၢႆးၼၼ်ႉဢမ်ႇႁုိင် ၶႃႈၸင်ႇဝူၼ်ႉၶတ်းၸႂ်ႁဵၼ်းလိၵ်ႈၶႃႈ ၼင်ႇႁိုဝ်ပေႃးတေလႆႈဢွၵ်ႇယၢၼ်ႁိူၼ်းဢၼ်မႄႈၶႃႈ ယူႇဝႆႉၼၼ်ႉ ဢမ်ႇႁိုင်ဢမ်ႇၼၢၼ်း ယွၼ်ႉတၢင်းၶတ်းၸႂ်ၶႃႈသေ ၸင်ႇမီးသုၼ်ႇလႆႈၵႂႃႇ ၶိုၼ်ႈႁဵၼ်းတီႈမိူင်းသိင်ႇၵပူဝ်ႇယူႇယဝ်ႉ ဢမ်ႇႁုိင်သင်ၶႃႈၵေႃႈတႄႇၼႃႈႁိူၼ်း၊ သိုဝ်ႉလႆႈႁိူၼ်းႁင်းၵွၺ်း၊ မီးလုၵ်ႈဢွၼ်ႇသွင်ၵေႃႉ သေယူႇမူၼ်ႈသိူဝ်းၸွမ်း လုၵ်ႈလၢင်းၼၢင်းမႄးၶႃႈယူႇယဝ်ႉ။

    ဢမ်ႇထၢင်ႇဢမ်ႇထူိမ်သေ မီးဝၼ်းၼိုင်ႈ မႄႈတႃမွတ်ႇၶႃႈ လုၵ်ႉတီႈလႂ်မႃးဢမ်ႇႁူႉ ၵိုင်ႉၵၢင်ႉပေႃႇမႃးတီႈႁိူၼ်းၶႃႈ ယွၼ်ႉဝႃႈႁိုင်ၼၢၼ်းယဝ်ႉ ဢမ်ႇလႆႈႁၼ်ၶႃႈႁဝ်း ယဝ်ႉၵေႃႈၶႂ်ႈႁၼ်ၵေႃႉပဵၼ်လၢၼ်ၼႆလႄႈ ၸုၵ်းပၢၵ်ႇၽၵ်းတူ သေတူၺ်းလၢၼ်မၼ်းယူႇ လုၵ်ႈၶႃႈၵေႃႈမိူၼ်ႁၢင်ႈၶႂ်ႈၵူဝ်မၼ်းသေ ႁွင်ႉလႄႈၶႃႈၸင်ႇႁၼ်သေယဝ်ႉ ႁိုတ်းလႃႇသႂ်ႇပၼ်မၼ်းဝႃႈ "မႂ်းႁတ်းၵႃႈႁိုဝ် ၶဝ်ႈမႃးၼႂ်းႁိူၼ်းၵဝ်ၼႆႉ ဢမ်ႇႁၼ်ႁလုၵ်ႈဢွၼ်ႇၵူဝ်ူဢိူဝ်ႈ ဢွၵ်ႇၵႂႃႇၼႂ်းႁိူၼ်း ၵဝ်မိူဝ်ႈလဵဝ်ၼႆႉ ဢွၵ်ႇၵႂႃႇ......." ၵမ်းၼၼ်ႉမႄႈၵဝ်ၶႃႈၵေႃႈၸင်ႇၶိုၼ်းတွပ်ႇဝႃႈ " ၶႂၢင်ႉပၼ်ဢိတ်းၼိုင်ႈ ဢမ်ႇလႆႈတင်ႈ ၸႂ် မႃးႁိူၼ်းၼႆႉ ႁဵင်းလိၵ်ႈၽိတ်းၵွၺ်း" ၼႆသေဢွၵ်ႇႁိူၼ်းၵႂႃႇယူႇယဝ်ႉ။

        ဝၼ်းၼုိင်ႈ မီးလိၵ်ႈၽိုၼ်ၼိုင်ႈ တီႈႁူင်းႁဵၼ်းၵဝ်ႇမၼ်းႁွတ်ႈမႃးထိုင် ၽိတ်ႈမွၵ်ႇမႃးႁႂ်ႈၶိုၼ်ႈႁွတ်ႈပၢင်ၵုမ်ၼႆလႄႈ ၶႃႈၸင်ႇလႅၼ်မေးၶႃႈဝႃႈ တေဢွၵ်ႇၶၢဝ်းတၢင်း ၵဵဝ်ႇလူၺ်ႈၵၢၼ်ၵႃႉၶၢႆၼႆသေ မိူဝ်းၵႂႃႇယဝ်ႉ။ ဝၢႆးပၢင်ၵုမ်ယဝ်ႉ ၶႃႈၸင်ႇမိူဝ်းဝႄႉလႄႇ ႁိူၼ်းၵဝ်ႇတီႈမႄႈၶႃႈယူႇဝႆႉၼၼ်ႉၵႅပ်ႉၼိုင်ႈ ၽိူဝ်ႇႁွတ်ႈမိူဝ်းတီႈႁိူၼ်းၼၼ်ႉ ၵူၼ်း ႁိမ်းႁိူၼ်းမွၵ်ႇလၢတ်ႈတီႈၶႃႈဝႃႈ "မႄႈမႂ်းတၢႆယဝ်ႉ"ၼႆ ၶႃႈတႄႉၵေႃႈဢမ်ႇတိုၼ်ႇတဵၼ်ႈ ဢမ်ႇတိူဝ်ႉၸႂ်သင် ၶဝ်ဢဝ်လိၵ်ႈၽိုၼ်ၼိုင်ႈ ယိုၼ်ႈပၼ်ၶႃႈ ၶႃႈယိပ်းဢဝ်သေပိုတ်ႇလူတူၺ်း ၼႂ်းၼၼ်ႉတႅမ်ႈဝႆႉဝႃႈ" လုၵ်ႈႁၵ်ႉမႄႈ......ဢမ်ႇ မီးမိူဝ်ႈလႂ် ၶၢဝ်းမႄႈဢမ်ႇဝူၼ်ႉထိုင်လုၵ်ႈ ၶႂၢင်းပၼ်မႄႈသေၵမ်း လွင်ႈဢၼ်မႄႈမႃးတီႈႁိူၼ်းလုၵ်ႈၵဝ်တီႈၸိင်ႇၵပူဝ်ႇ ႁဵတ်းႁႂ်ႈလၢၼ်ၵဝ်လႆႈႁၼ်သေယဝ်ႉၵေႃႈၵူဝ်ၼၼ်ႉ မႄႈလႆႈငိၼ်းယူႇ လွင်ႈဝႃႈလုၵ်ႈၵဝ်တေႁွတ်ႈမႃးၼႆၼၼ်ႉ ၵူၺ်းၵႃႈမႄႈတိူဝ်ႉၸႂ်တႄႉတႄႉ  ဢမ်ႇမီးမၢၵ်ႇတႃၸိူင်ႉၼၼ်! ၵွပ်ႈၼၼ်လႄႈ မႄႈၵေႃႈဢဝ်မၢၵ်ႇတႃမႄႈၶွၼ်ၼိုင်ႈ ပၼ်လုၵ်ႈၵဝ်ယဝ်ႉ ထႅင်ႈဢၼ်ၼိုင်ႈၵေႃႈ မႄႈၸူမ်းၸွမ်းလုၵ်ႈၵဝ် ဢၼ်ဢဝ်မၢၵ်ႇတႃမႄႈသေ တူၺ်းႁၼ်လႆႈၼႂ်းၶူင်းၵၢင်ၼႆႉတႄႉတႄႉ ႁၵ်ႉလုၵ်ႈသေပိူၼ်ႈၼႃ ႁႂ်ႈလုၵ်ႈၵဝ်မီးတၢင်းသိူဝ်းၸႂ်သေၵမ်း........…"

ပိၼ်ႇတႅမ်ႈ

ၶိင်းတႆး

1/July/2015