ၼမ်ႉမေႃႇဢွၼ်တၢင်းသုတ်းပူိၼ်ႈ

မီးဝၢၼ်ႈမူိင်းဢွၼ်ႇမူိင်းၼုိင်ႈ ယူႇၸမ်ၼွင်လူင်လုၵ်ႈၼုိင်ႈ၊ ယွၼ်ႉၽူၼ်ဢမ်ႇတူၵ်းၽႃႉဢမ်ႇလီလႄႈ ၼွင်ၵေႃႈ ႁႅင်ႈဝႆႉယဝ်ႉ။ ၵူၼ်းဝၢၼ်ႈၵူၼ်းမူိင်းၵေႃႈ ႁွၼ်ႉလူိတ်ႇဢုိတ်ႇမႆႈလူင်ၵႂႃႇၸူးၶုၼ်ႁေႃၶမ်းယဝ်ႉ၊ ၵူၼ်းၸူိဝ်းပဵၼ်ၸဝ်ႈ ႁႆႈၸဝ်ႈၼႃးၵေႃႈ''ၽူၼ်ဢမ်ႇတူၵ်း ၼမ်ႉဢမ်ႇမီး ၼႃးႁဝ်းၵေႃႈဢမ်ႇမီးၼမ်ႉ ၶဝ်ႈၼႃး လႄႈ ၽၵ်းယိူဝ်ႈၼၢင်း ၶဵဝ်၊ မၢၵ်ႇဝၢၵ်ႈတၢင်းၵိၼ်ၵေႃႈ ဢမ်ႇမၢၵ်ႇဢမ်ႇဢွၵ်ႇ"ၼႆယဝ်ႉ၊ ၸိူဝ်းပဵၼ်တမ်ႇငႃႈ မဵတ်းပႃ ႁႃပူၵေႃႈ ''ၼမ်ႉႁႅင်ႈ ဢမ်ႇမီးၼမ်ႉ ပူပႃၵေႃႈဢမ်ႇမီး ႁဝ်းၶႃႈတေၵိၼ်ယူၵွႃႇၸူိင်ႉႁုိဝ်"ၼႆ ႁင်းၶဝ်ထႅင်ႈ၊ ၸုမ်းၼၢင်းယိင်းၶဝ်ၵေႃႈ ''ၼေႃးၼေႃႈ ၶႅၼ်းတေႃႈၶုၼ်ၸဝ်ႈမုၼ်ယႂ်ႇၶုၼ်ႁေႃၶမ်းႁဝ်းၶႃႈ ၵဵတ်ႇၶႄႁဝ်းၶႃႈသေၵမ်း''ၼႆယဝ်ႉ၊ ၸူိဝ်းပဵၼ် လုၵ်ႈဢွၼ်ႇလုၵ်ႈဢီႈၵေႃႈ ဢွၼ်ၵၼ်ႁွင်ႉႁွင်ႉႁွင်ႉႁႆႈႁႆႈ တူၺ်းၼႃႈၶဝ်ဝူၺ်ႇဝူၺ်ႇႁင်ႈႁင်ႈ မီးၼမ်ႉတႃၶဝ်ၵူၺ်း ယဝ်ႉ ဢၼ်သႂ်။

ၶုၼ်ႁေႃၶမ်းၸင်ႇၸႂ်ႉ ၶုၼ်သုိၵ်းလူင်သီႇၵေႃႉ ၵႂႃႇသီႇၼႃႈမူိင်း ႁႂ်ႈၵႂႃႇႁႃၼမ်ႉၼႆယဝ်ႉ။ ၶဝ်ၵူႈၵေႃႉဢွၼ်ၵၼ်ႁႃ ဝၼ်းၵူပ်းၶုိၼ်း ၶုိၼ်းၵူပ်းဝၼ်း ႁႃၶဝ်ႈႁူၺ်ႈၶဝ်ႈႁွင်ႈ ႁႃတၢင်းၼူိဝ် တၢင်းတႂ်ႈ ႁႃၵူႈတီႈၵူႈတၢင်းသမ်ႉပေႃးတူိၵ်ႈ ႁင်းၽႂ်ႁင်းမၼ်းယဝ်ႉလႄႈ တႃႇသၢမ်ၵေႃႉတႄႉယွမ်းၵၢၼ်ႉသေႁွတ်ႈမႃးၶုိၼ်းမူိင်းၶဝ်ယဝ်ႉ။ ၵူၺ်းၵႃႈ ၶုၼ်သုိၵ်း လူင်ဢၼ်ႁွတ်ႈၵွႃႇၽႆႇႁွင်ႇၼၼ်ႉ ဢမ်ႇၶၢမ်ႇသုတ်ႈႁူၼ် ဢမ်ႇယွမ်းၵၢၼ်ႉ ႁႃတီႈၼုိင်ႈယဝ်ႉတီႈၼုိင်ႈ ၵႂႃႇၵႃႈဢမ်ႇ ႁၼ် ၵႃႈဢမ်ႇၺႃးၼႆယဝ်ႉ။ မၼ်းၸင်ႇႁွတ်ႈၵွႃႇဝၢၼ်ႈၸိၵ်းလွႆဢွၼ်ႇဢၼ်ၵတ်းၵတ်းတီႈၼုိင်ႈ။

မၼ်းၸင်ႇၵႂႃႇလူိၵ်ႈတီႈသၢင်ႇထုၵ်ႇတီႈၼုိင်ႈသေလုိဝ်ႈႁူိဝ်ႉဝႆႉယဝ်ႉ ၸင်ႇမီးပူႇထဝ်ႈၵေႃႉၼုိင်ႈ မႃးၼင်ႈႁိမ်းမၼ်း၊ မၼ်းၵေႈၸင်ႇလၢတ်ႈဝႃႈ''ၵဝ်ၶႃႈလုၵ်ႉတီႈဢၼ်တူင်ႇဝူိင်းတၢင်ႇတီႈသီႇလႅၼ်မႃးယဝ်ႉ ၵဝ်ၶႃႈပဵၼ်ၵူၼ်းၶုၼ်ႁေႃ ၶမ်းမူိင်းၼုိင်ႈ မူိင်းႁဝ်းၶႃႈၽူၼ်ဢမ်ႇမႃး ၼမ်ႉႁႅင်ႈဝႆႉလႄႈ ၸွင်ႇလုင်းႁဝ်းၶႃႈ တေၸွႆႈၵဝ်ၶႃႈႁႃၼမ်ႉမႃးလႆႈၶႃႈ ႁ"ၼႆႁင်းပူႇထဝ်ႈယဝ်ႉ။

ၵမ်ႉၼၼ်ႉပူႇထဝ်ႈၵေႃႈၸင်ႇၸူဝ်းမၼ်းၶုိၼ်ႈလွႆၵႂႃႇ၊ ၽႅဝ်ၵႂႃႇတီႈထမ်ႈလုၵ်ႈၼုိင်ႈ ၸင်ႇဢဝ်မုိဝ်းမၼ်းၸိၼႄ ဢၼ်ၶၢဝ်ၶၢဝ်မီးယူႇၼႂ်းထမ်ႈၼၼ်ႉသေလၢတ်ႈဝႃႈ "ဝၢၼ်ႈမူိင်းႁဝ်း ၵေႃႈဢမ်ႇမီးၼမ်ႉၼင်ႇၵဝ်ႇ ဢၼ်ၼႆႉႁဝ်း ႁွင်ႉဝႃႈ ၼမ်ႉၵၢမ်ႈ ဢဝ်ၵွႃႇဢဝ်ၵႂႃႇမူိင်းသူလႄႈ မူိင်းသူတေဢမ်ႇလႆႈယူႇဝူၺ်ႇႁင်ႈထႅင်ႈယဝ်ႉ တႄႇဢဝ်ၼႆႉၵႂႃႇ" ၼႆယဝ်ႉ။ ၵမ်ႉၼၼ်ႉၶုၼ်သုိၵ်းလူင်ၵေႃႈ ၸင်ႇၵႂႃႇႁၵ်းဢဝ်ၼမ်ႉ ၵၢမ်ႈၼၼ်ႉသေတၢင်ႇလေႃႉမႃႉရထႃးမၼ်းမူိဝ်းၵႂႃႇ ယဝ်ႉ။

ထုိင်ၼႂ်းမူိင်းယဝ်ႉ ယွၼ်ႉဝႃႈမႃးၵႆယဝ်ႉလႄႈ ၼမ်ႉၵၢမ်ႈၵေႃႈၸုိမ်ႈၵႂႃႇၼမ်ႉယဝ်ႉလႄႈၵုိတ်းလဵၵ်ႉလဵၵ်ႉဢွၼ်ႇၵူၺ်း ၵူၼ်းမူိင်းၼၼ်ႉ ၽႂ်ၵေႃႈဢမ်ႇယၢမ်ႈႁၼ်ၼမ်ႉၵၢမ်ႈသေၵေႃႉ ဢွၼ်ၵၼ်မႃးၸုၵ်းတူၺ်းပဵၼ်မူႇလူင်ဝႆႉ ၶဝ်ဝႃႈ"ႁဵတ်းႁုိဝ်ၵေႃႈ ပဵၼ်ၸူိဝ်ႉ ပဵၼ်ၽၼ်းၼမ်ႉယဝ်ႉ"ၼႆသေ ၶုၼ်ႁေႃၶမ်းၸင်ႇသင်ႇ ႁႂ်ႈဢဝ်ၵႂႃႇၽုၵ်ႇၵမ်းလေဝ်ယဝ်ႉ။

ၸဝ်ႈႁႆႈၸဝ်ႈၼႃး ၸင်ႇဢွၼ်ၵၼ်ၶုတ်းလိၼ်ယဝ်ႉ မူိဝ်ႈယၢမ်းၶဝ်တုိၵ်ႉၶုတ်းႁူးယူႇၼၼ်ႉ လႅတ်ႇၵေႃႈမႆႈလႄႈ ဢၼ်ပဵၼ်ပုတ်းၼမ်ႉၵၢမ်ႈၵေႃႈ လႆႈၸိူမ်ႈၵႂႃႇၵမ်းဢိတ်းၵမ်းဢိတ်းသေႁၢႆလၢႆၶဝ်ႈၼႂ်းလိၼ်ၵွႃႇယဝ်ႉ။ ၽူိဝ်ႇၶဝ် တူၺ်းၵႂႃႇတီႈၸူိဝ်ႉၽၼ်းၼမ်ႉၵၢမ်ႈမီးၼၼ်ႉဢွၼ်ၵၼ်ဝူၼ်ႉၵႂင်ႁင်းၽႂ်ႁင်းမၼ်း  ယွၼ်ႉဢမ်ႇႁၼ်မႅၼ်ႈယဝ်ႉလႄႈ ၸင်ႇဢွၼ်ၵၼ်ၼႅတ်ႈၶုတ်းတီႈဢၼ် မၼ်းၸိူမ်ႈၶဝ်ႈလိၼ်ၵႂႃႇၼၼ်ႉယဝ်ႉ။ ဢွၼ်ၵၼ်ၶုတ်းၶုတ်း ၶဝ်ႈလိၼ် ၵႂႃႇလုိၵ်ႉလုိၵ်ႉၵေႃႈပႆႇႁၼ် ၶုတ်းတင်းၶမ်ႈတေႃႇမူိင်းၸမ်လႅင်း ယွၼ်ႉႁူိဝ်ႉၼႃႇယဝ်ႉလႄႈ ၸင်ႇဢွၼ်ၵၼ် ၼွၼ်းဢူၼ်ႈတူဝ်ဢူၼ်ႈၶိင်းႁင်းၽႂ်ႁင်းမၼ်းယူႇယဝ်ႉ။

ၽူိဝ်ႇမူိင်းလႅင်းပၢင်ႇသႂ်မႃးယဝ်ႉ ၶုၼ်ႁေႃၶမ်းၸင်ႇမႃးတူၺ်း ၵူၼ်းၸူိဝ်းဢၼ်ၶုတ်းႁူးလိၼ်ၸူိဝ်းၼၼ်ႉၵေႃႈ ဢွၼ်ၵၼ်ၼွၼ်းလပ်းသဵင်ႈ မၼ်းၸင်ႇမႃးငွၵ်ႈတူၺ်းႁူးဢၼ်ၶဝ်ၶုတ်းၼၼ်ႉသေ တူၵ်းၸႂ်တူၵ်းၶေႃး တင်း ၸူမ်းတင်းတင်းႁွင်ႉပူၵ်းၸူိဝ်းဢၼ်ၼွၼ်းလပ်းဝႆႉၸူိဝ်းၼၼ်ႉ''လုၵ်ႉ လုၵ်ႉ ဢၢႆႈၵဝ်တင်းသဵင်ႈ ၸူိဝ်ႉၽၼ်းမဵတ်ႉ ၼမ်ႉၼၼ်ႉ မၼ်းယႂ်ႇမႃးပၼ်ႁဝ်းယဝ်ႉ"ၼႆယဝ်ႉ။

လွင်ႈတၢင်းၼမ်ႉဝေႃႇပေႃႇပဵၼ်မႃးၵေႃႈ ပဵၼ်ၸူိင်ႉၼႆယဝ်ႉ။ 

သုတ်း။

ပိၼ်ႇတႅမ်ႈ

ၶိင်းတႆး

1,July,2015